text： Venus@天才女行社 | photo：新傳媒資料室
個案01 | 防不勝防！扮前台職員套料！
不少酒店check-in時要用信用卡留押金，竟然成為騙徒呃人的謊言。有網友分享經歷，話自己在酒店櫃枱用信用卡順利check-in，上到房不久收到房內電話，有人自稱「櫃枱職員」，表示剛才留押金的程序出了問題，要求對方再次提供信用卡號碼及 CV code 以確認押金。其實是騙徒於酒店 check-in 高峰時以街線打入酒店房內電話呃人。由於是房內電話，真實感大增。而且騙徒專業，語氣似到十足十，結果事主信以為真，自動提供晒資料畀人任用。
破解01 | 酒店會用電話問資料？
一般情況下，酒店不會要你在電話中提供相關資料。如果有，都係酒店唔專業。所以，如果收到類似電話應該收線，再致電櫃枱詢問，最好直接落大堂問清楚。
破解02 | 信用卡check-in，冇可能補問資料！
如果check-in當下未能成功以信用卡留押金，根本不會成功拿到鎖匙上房。記者上次到澳門某酒店公幹都用了信用卡check-in，結果刷了兩次卡都未能成功，原來是磁帶太舊，搞咗一大輪，總之唔得唔會放行，最後要改用現金押金。
個案02 | 「Express Checkout」易被偷資料？
另外又有旅客分享，上月入住澳門Holiday-Inn 酒店期間，用了信用卡 「Express Checkout」 服務，之後懷疑資料外漏。所謂 「Express Checkout」，好多酒店匙卡都會夾住一張小表格，給你填寫全名、信用卡資料（不包括CV code），checkout 時，將表格連匙卡放入大堂的特定箱內，咁就走得，毋須於櫃枱排隊，若有特殊費用會直接扣數。網友指，翌日凌晨即收到信用卡短訊通知，指有筆$900美金可疑款項交易，由於相當不尋常，按程序已中止交易及凍結信用卡，好彩冇損失，係要換過張新卡麻煩少少。雖事件發生時間很近，但信用卡中心指調查不到是否因 「Express Checkout 」導致資料外漏。
破解 |懷疑被盜用信用卡該怎辦？
資料外漏有許多原因，如果在外地用了「 Express Checkout」 或任何信用卡交易，只好更為小心。好多人去外遊就「不理世事」關電話，其實最好用漫遊或 Wi-Fi 上網定時檢查信用卡用款情況是否相符，或留意有否收到信用卡中心電郵或短訊通知。如果發現可疑情況，應立即致電信用卡中心凍結信用卡。