日全蝕、超級月亮、獅子座流星雨等天文現象,都可以準確預測得到,只要天公作美唔好多雲落雨,要看實在唔難,唯獨 極光 ,以現今科技也不能百分百準確預測到出沒時地方位。想放假去圓夢睇 極光 ,究竟去邊度好?如何計劃行程好?等我呢位「見唔到過」兩次極光的過來人分享一下。

text:fancare

「見唔到過 」兩次極光, 即係點?

話說記者追過兩次極光,一次去瑞典北部 Kiruna,一次去挪威北極圈內的 Tromsø,兩次都發現天上有綠色殘影在舞動,不過肉眼唔多睇到,因為極光出現唔一定好似網上圖片咁成個天變綠,太陽活動弱雞的話,肉眼是未必看到的,用相機曝光10秒至半分鐘,才更清晰。呢兩次都只係影到見唔到,交到差但仲想再去用肉眼睇囉!

甚麼月份去睇極光最好?

有說10-2月去北歐最好,因為時為當地冬季,日短夜長,以機會率來說,愈長夜晚當然是愈大機會見到啦!不過統計發現9月及3月更容易看到極光,因為春分、秋分時,太陽風繞到地球的角度最易引發 極光,而且避過天氣最凍嘅1、2月,野外等待 極光 都冇咁辛苦!

千祈唔好月圓之夜出發!

千祈唔好月圓之夜出發!千祈唔好月圓之夜出發!千祈唔好月圓之夜出發!重要事情要講三次!雖然極光出現講求天氣和太陽活動,當月圓時月亮照得地面光亮,極光強烈還可,但如果弱弱的極光被月亮搶去光芒,影相都唔靚,情況同拍攝星空一樣,有月光就會搶去星空光芒!建議避開月圓前後5天,農曆初十至二十就避之則吉!