「喂!大家識咗十幾年,不如搵個日子,去次旅行吖!」WhatsApp group 內唔知邊條粉腸講咗呢句嘢,大家都紛紛贊成,WhatsApp group好耐未試過咁熱鬧,旅行搞手 幾難做都要做,不過估唔到,呢個係友情決裂嘅開始。

人多意見多 時間、地點難有共識

起初決定邊個月份去旅行,大家都好配合揀好咗一個月份,十幾年友誼果然係唔同啲!至於去邊度旅行,竟然足足傾咗成個月。有人隔岸觀火,完全唔出聲唔畀意見,亦有人諸多意見,乜都唔啱佢心水。

我心諗,不如搵個星期六、日去長洲算數……

住宿要求各不同 不遷就寧願分開住酒店

最後我哋決定咗去韓國,因為有幾個朋友係第一次去,佢哋就負責訂機票。打鐵趁熱,為咗可以盡快成事,訂機票、訂酒店、plan行程都由唔同人負責。我去得比較多次,負責plan行程同訂酒店。我選擇咗新村呢區,send咗幾間酒店問大家意見,點知有幾個話太貴,其實唔需要住咁靚,反正都係瞓覺。

於是我就搵咗幾間motels,其實我住過幾次,韓國motels地方又乾淨,價錢又平。不過group內其中一個女仔就話:

「咦~呢啲地方咁雜,如果你哋想住,我自己畀貴少少住酒店,唔使理我呀!」

一班朋友去旅行,但分開住唔同酒店係咩玩法?最後,我揀咗間遠地鐵站少少,但價錢中等嘅酒店。當我以為問題已經解決,想問下佢哋打算訂邊日 ……

分工買機票零進度 朋友退出意慾減

先知原來負責訂機票嘅人完全未開始搵機票!「我諗住睇下有冇特價機票嘛~話時話,韓國有冇分邊個機場?用邊間航空公司好?」結果,機票都係由我負責番,算數啦!只係上網訂機票啫,但係……可能大家嘅熱情已經冷卻,我連問佢哋攞證件資料,都已讀不回我。

「Sorry啊~我要留幾日大假返鄉下,應該唔夠假去旅行,你哋玩得開心啲。」其中一個朋友退出,令大家去旅行嘅意慾跌至谷底。

「冇所謂」卻是有所謂 旅行變長洲遊

等咗幾日,我都仲未收齊所有人嘅證件號碼……嬲嬲哋,我問咗一句:「其實大家係咪真心想去?如果唔係嘅話,由得呢個group好似以前咁,約食飯永遠約唔到,有人生日就講句生日快樂,繼續維持番呢段友誼都OK,唔想勉強大家。」

最後件事點收科?我哋真係去咗長洲半日遊。有人想食魚蛋,有人想踩單車,又有人嫌太辛苦……

「冇所謂,你哋話事啦~唔使遷就我~」由決定去旅行,到最後成團失敗。呢句說話出現咗好多次,每一次「冇所謂」,某程度其實代表住你唔太尊重呢個旅程。

失去默契 只能保持距離維持友誼

諗深一層,其實去唔成都係好事,因為照咁情況睇,就算夾硬去到旅行,成個行程都唔會開心。

原來當關係淡化到某個程度,會各執己見,互不相讓。

冇咗以前嗰種默契,但斬斷呢種關係又覺得太可惜。

雖然咁諗好可悲,但保持一個距離,咁樣對大家都好。

延伸閱讀:陪女友追韓星,一入場我嚇親……| 藍橘子