男人飯局 | 女朋友總覺得，成班男人聚埋一齊嘅飯局唔係好嘢

今晚，我去咗一個「兄弟救援」嘅飯局，而今次苦主係阿強。咩叫兄弟救援呢？

唔知各位巴打有冇呢個 WhatsApp group，入面全部都係男人，可能係約埋踢波嘅，或者間唔中會出嚟一次飯局嘅，當然啦～得閒仲會講下啲唔出得街嘅成人話題。

女友眼中的衰嘢男人離不開的飯腳

『喂！最近流出條片好正！有冇睇？』
『Send嚟啦！我睇完返屋企要del啊，費事被女友見到……』
『如果呢個女星做老婆每日生活會點過？』
『任記新主機就快出，想入手有咩要注意？』

對於女朋友嚟講，呢個麻甩佬group永遠都係講「衰嘢」嘅group。但就算女朋友點樣反對都好，你都唔會離開，因為呢個group好重要。

『兄弟們，有嘢想出嚟傾下……』偶爾會見到group內有人發出類似嘅訊息，又或者……發呢個訊息嘅人係你。

鐵漢都總有柔情嘅時刻，就算女朋友係最好嘅傾訴對象，但總有些事……係班兄弟無法被取締。咩叫兄弟啊？一叫即蒲頭就係兄弟！

不過呢，遇到挫折向其他人求助總係比較難開口。阿強起初都尷尷尬尬咁，但係男人堆就係咁有趣，一班兄弟唔會問佢發生咩事，照樣陪佢食煙飲酒講粗口，玩到興起，就會自然地講心事。

「喂……其實最近呢……我點點點……」阿強。

作為兄弟會點安慰你？答案係……佢哋唔會安慰你，只會用最狠毒嘅粗口鬧你對頭人，就好像呢件「不幸」嘅事發生喺佢哋自己身上咁。

「我一早估到啦！睇佢個樣就知佢係奸！」
「呢啲咁嘅人，畀佢成功咁又點？佢都冇朋友！」
「多、多謝你哋啊，我開心番好多……」阿強。
「咪咁老土啦！飲吖～」

冇錯！兄弟幫兄弟，係唔需要講多謝。見阿強終於都笑番，再望下呢班好兄弟。雖然就算鬧完笑完，情況都唔會有改變，兄弟們未必實際幫到阿強，但所有人嘅粗口，對於阿強嚟講都係正能量。

大家又有幾耐日子冇約班兄弟出嚟食飯？以前寧願逃學都為咗去網吧打機，今日永遠有藉口婉拒個飯局。其實約得出嚟食飯，原因只得一個！

想一班兄弟見下面，就係咁簡單。