身為澳紐的死忠,就算去幾多次睇風景我都唔覺悶㗎!不過單單大山大水嘅相,真係難啲呃like……其實花啲心思,攞張白卡紙雕通動物形狀,拼貼落旅行沿途嘅風光,自然景色都可以多變好玩!

撰文:Hoilee | 圖片:Chi | 原文刊於880 期《新假期》

白卡紙雕可以將一式一樣嘅例行景點即變獨一無二,但首要係場景唔好太大風,否則都幾狼狽……途人見我玩得咁開心,仲主動走過嚟問我可唔可以影埋一份,有人賞識我嘅作品係開心嘅!

假若你都係終極動物控同大自然愛好者,下次起行前,不妨整定套「 文青 系造作道具」,包保你好似漆黑中嘅螢火蟲咁惹人注目!

出發前深宵趕工!

嫌市景平平無奇,經過街邊的小花叢,襯托我至愛的熊貓,心情即刻大好!

因為一本書,反而更仔細留意周圍有冇特別嘅背景,電話都撳少咗!

墨爾本向來是藝術氛圍濃厚的小鎮,隨處可見裝置藝術,即刻出動企鵝仔打卡!

黑氣當頭的我,往往一攞張紙出嚟就起風,下次真係要換張硬啲嘅卡紙。

陽光與海灘嘅晒命相,未必要動用比堅尼嘅,海豚躍泳仲吸引啦!

隨身帶備私伙樹熊,撞啱紋理特別的靚樹就過去攬啦!

去澳紐,走唔甩行酒莊呢啲指定行程,今次加深難度勾畫酒杯邊,紙身更脆弱,但就透出更大範圍的靚景。

無論否認幾多次「我唔係文青」,身邊人都堅稱我係走文青路線。Well,都好過港女同MK嘅。