「男同女係思維完全唔同嘅生物,冇情侶一開始就 天生一對 。」

 


每逢星期日,就係我同女朋友小豆嘅電影日。兩個人睇套早場(因為貪平),食個lunch,再返屋企瞓個靚覺,生活簡單而幸福。

「橙仔,你放工記得去買飛啊!」有時小豆臨放工前會打嚟提我。
「得啦!」

一個鐘後 :

「請問你放工有冇去買飛?」
「呃……唔記得咗。」當時我已經返到屋企,完全唔記得有呢回事……
「唉……我都估到,提咗你都唔記得!」
「唔緊要啦,上網買飛囉,幾蚊手續費啫……」
「唔係錢嘅問題啊!點解十分鐘前提咗你都唔記得……」
「哈哈,係啊~我係金魚腦嚟~」
「金魚佬就有你份!」

除咗冇記性,我仲會唔知醒……
每次諗住享受埋個美好嘅假日早餐先睇戲,結果總係咬住舊麵包,趕頭趕命咁跑入戲院……

我好努力去改,但只能夠改善,冇辦法根治。
女朋友由發脾氣,變成抱怨,到最後一齊遲到、一齊冇記性,呢啲真係傳說中嘅近墨者黑……

懶、冇記性、認叻、粗心大意、死性不改……呢幾種彷彿係大部分男人嘅構成元素。
而女仔通常都係相反,所以兩個人拍拖初期一定會有摩擦,覺得觀念截然不同而鬧交。
但日子耐咗,其中一方就會被同化……

若果搵到一個唔會嫌棄你缺點,又慢慢被你同化嘅女仔,一定要好好珍惜。
因為未必個個都撐得過雙方磨合呢個階段。

當理解到男同女係完全唔同結構嘅生物,就唔好再嫌棄女朋友,點解乜都要你講出口。

掛住又要講,愛你又要講……
因為你自己都知道,男人係有種乜都認為放喺心就OK,毋須講出口,女朋友就會明白嘅心態。

唉~老老實實,女朋友就算真係明,都係要你講出口先心息~
若果你不爽,點解一定要我改,而唔係佢改先?!
你應該諗深一層,你想女朋友乜都擺喺心唔講,定係你講出口喇?


專頁:http://www.facebook.com/BlueGodZi
Ig:BlueGodZi