尋晚，差不多瞓覺時，女朋友打電話嚟，把聲好似走火警咁大喊：「開電腦！即刻開電腦！十二點有最後一擊啊！」
「乜鬼最後一擊啊？」
「特價機票！」
而每次有特價機票，佢都會打電話嚟叫我幫手一齊搶。雖然咁耐只係成功過幾次，但女朋友已經上晒癮。我懷疑佢根本係為咗搶機票而搶機票，目的地係咩國家都唔重要……
我女朋友堪稱係特價機票獵人，一早加晒所有旅遊資訊嘅page同網頁，仲同班朋友開咗個WhatsApp group，互相交流資訊。
不過我最近就發現，呢個group根本就係一個「晒命戰場」嚟。
如果大家有試過搶特價機票都應該感受過，每撳一個掣都要等佢無止境地loading，就算畀你揀啱日子，以為自己有幸搶到平機票，腦海不斷奔騰出自己去旅行時開心嘅畫面。
點知去到付款嗰一頁，網頁顯示番個正價……
女朋友唔止一次，開住十幾個視窗，眼神好似想殺人咁狂撳F5，最後對住個電腦螢幕咆哮。
我試圖去安慰佢：「其實航空公司有時做優惠，同依家你搶特價機票都係差一千蚊啫！唔好搞到自己咁勞氣啦～」
「你根本唔明白女人嘅心！」
原來，女朋友所謂嘅資訊交流group，有人若果搶到特價機票，都會晒命話：「今次去旅行好平啊～搶到特價機票～加埋稅都係一千蚊咋嘛～」
女朋友話根本唔係錢嘅問題，就算價錢只係平少少，但人哋搶到自己又搶唔到，個心情都非常肉酸，內心亦泛起一股復仇心，下次一定要搶到特價機票再晒命。
唔怪得我次次搶iPhone，女朋友都提唔起勁，仲話「哎吔～算啦～搶完又要去排隊攞機咁煩～」原來根本就唔係一轉手賺幾千蚊呢個問題，佢搶平價機票只係為咗啖氣。
回想番起，有次去韓國Starbucks見到隻期間限定嘅櫻花杯，女朋友攞咗喺手，心大心細諗緊買唔買，突然有幾個韓國女仔走入嚟，講咗句「得番一隻咋(韓文)」，女朋友就二話不說衝咗去畀錢……
到底係咪好多女仔買嘢都為咗啖氣？我唔知……
但我女朋友就一定係！
Ig：BlueGodZi