近來歐洲接二連三發生多宗恐怖襲擊，造成唔少傷亡，最近襲擊嘅死傷者更包括一個香港家庭，令即將出發遊歐嘅人士大為擔憂。為以防萬一，相信大家飛歐洲前一定會做足準備工夫，買番份旅遊保險傍身。不過你又知唔知，市面上並非所有旅遊保險都會保障 恐襲 造成嘅意外？為此，MoneyHero.com.hk幫大家比較咗香港7間旅遊保險公司對恐襲嘅保障情況，方便大家選擇最適合自己嘅旅遊保險！
恐怖襲擊目前尚未有一個國際公認嘅定義，所以保險公司會自行定義「恐襲」。一般而言， 恐襲 係指：「由個人或組織所籌劃，為達到政治、宗教、思想目的而進行的暴力行動，意圖製造恐慌以影響政府或公眾。」大多數情況下，保險公司會根據當地政府嘅定性而決定事件是否恐襲。
上表7間保險公司之中，中銀旅遊保險列明不承保恐襲，豐隆保險只承保「與非核生化相關的恐怖活動」，AIG對恐襲嘅保障只適用於「緊急醫療費用及援助」、「人身意外保障」、「緊急入息援助」及「信用卡保障」4方面，而其餘4間則將恐襲納入完整保障範圍。不過若涉及戰爭、政變等事故，則已超出恐襲範圍，承保恐襲嘅保險公司都未必會包。
如想搵一份價錢較平，又保障恐襲嘅保險，富衛（FWD）同世聯（Allied World）都係唔錯嘅選擇。以去法國旅遊10日為例，富衛「計劃A」保費只需$256，世聯「計劃II」只需$254，其中世聯除咗保障恐襲之外，仲包埋外遊期間嘅戰爭保障。
除咗睇價錢之外，選擇保險時，亦需留意保單賠償範圍及限額。其中「緊急醫療運送服務」尤其重要，因為醫療運送專機包括深切治療、醫生同護士，單靠自己未必安排到，而且所費不菲，最好選擇賠償限額為「全部開支/無上限」嘅保險。除此之外，醫療保障、人身意外保障、遺失行李/財物、行程延誤嘅賠償額度都應列入考慮之列。
如何得知一份保險保唔保 恐襲 ？
雖然恐襲風險愈來愈高，但旅遊保險小冊子或網站上甚少於當眼處清楚列明是否就恐怖襲擊提供保障。要知道一份保險保唔保障恐襲，主要有兩個方法：（1）查看保險小冊子/保單條款上所列出嘅「不承保事項」，如該保險並冇列明不承保恐襲，通常代表將恐襲納入保障範圍；（2）親自致電保險公司或保險中介人查詢，職員可以解答你對該保險嘅疑慮。
前往有外遊警示嘅地方，會否獲得保障？
因發生多宗恐襲事件，保安局已對德國發出黃色外遊警示。一般情況下，黃色外遊警示對保單並冇任何影響，一切如常受保。如果係發出紅色或黑色旅遊警示，保險公司可能只會保障與旅遊警示發出原因無關嘅意外。但若果發出旅遊警示嘅原因，係旅遊保險嘅「不保事項」之一，如戰爭、政變和叛亂等等，則整份旅遊保險都會唔受保。每家保險公司嘅條款各有差異，實際情況應詢問保險公司。
另一方面，如購買旅遊保險後，才發出紅色或黑色旅遊警示，大部分保險都會涵蓋因外遊警示所導致行程取消之相關費用。一般而言，黑色警示會涵蓋全部取消費用，紅色則會涵蓋一半費用。
防患於未然，旅遊保險愈早買愈好
好多人以為旅遊保險於出發前一、兩日買就得，但事實係，當你訂好機票住宿嗰刻，就應該買定旅遊保險喇！因為購買保險後，萬一出發前因恐襲或自然災害而要取消行程，都可以獲得旅遊保險嘅保障。相反，如果發生恐襲或自然災害後，先購買保險，無論你如期出發或更改行程，保險公司都有權唔包。所以為防意外發生，旅遊保險都係愈早買愈好！